早幾日名阿史就講到荃灣原本叫做淺灣,但由於村民覺得唔吉利,所以就改名叫做「全灣」,而促成呢件事嘅,全靠一位晚清嘅秀才楊國瑞。楊國瑞為新界人做過唔少貢獻,威水到直頭有條路用佢個名嚟命名,呢條路就叫做國瑞路。

楊國瑞出生喺楊屋村,喺光緒三十年嘅時候參加過科舉,拎到秀才嘅功名。自此以後,佢就更加着重為居民謀福址。除咗幫荃灣改名之外,佢仲喺唔少社區事務上出謀獻策。喺1923年,佢就曾經參與發起「新界農工商業研究總會」,亦即係今日新界鄉議局嘅前身;而且佢仲有份創立荃灣鄉事委員會嘅前身「全安局」,喺團結新界居民同埋荃灣日後嘅發展方面,都作出唔少貢獻。而喺1970年代,隨住荃灣慢慢發展成新市鎮,當局就決定用佢嘅名命名一條道路,以紀念佢曾經作過嘅貢獻。

原圖嚟自網絡