關於荃灣,阿史早幾日就講過由於呢一帶經常有海盜聚集,所以新界人就有一句「尋財路舊金山,尋死路去荃灣」。而喺十八世紀嘅時候,英國人繪製荃灣地圖嘅時候,仲將荃灣命名做「海盜灣」。唔講唔知荃灣附近,其實仲有一個叫做「醉酒灣」嘅地方,都真係同醉酒呢件事有關。

據講喺呢個醉酒灣上面,由於經常都有海盜聚集,而海盜除咗日常出去搶劫之外,就係會喺呢個海灣上面飲酒,唔少飲醉嘅海盜都會四處鬧事,有啲仲會殺人,於是呢個地方就被稱為「醉酒灣」。

而關於「醉酒灣」地名嘅起源,原來仲有另一個講法,就係話早年香港有外籍居民,佢地放假嘅時候都會自己揸架船出嚟,而嚟到呢個地方嘅時候都會飲酒狂歡,所以就被叫做醉酒灣。

至於以上邊個講法先啱,阿史就真係唔知,但喺十九世紀末,就有唔少承辦商用木船運載垃圾嚟到呢度傾倒,所以「醉酒灣」亦都因為咁而變成「垃圾灣」。

原圖嚟自網絡