受疫情影響,呢排啲酒吧生意真係幾差,阿史行過灣仔都見唔少酒吧冷冷清清。不過,仍然有啲外國人唔戴口罩繼續响酒吧到飲酒,似乎灣仔啲酒吧真係幾令佢哋樂而忘返。

今時今日响灣仔駱克道一帶有好唔少酒吧,其實呢個係灣仔昔日紅燈區一個延續。以往灣仔個一帶燈紅酒綠,仲有好多風月場所,呢個紅燈區出現,原來同五十年代韓戰大有關係。响上世紀五十年代初韓戰爆發,美國艦隊就响香港進行補給,據了解當時美軍响港島仲有個專用碼頭,响停泊香港期間啲士兵就上岸娛樂消遣,亦因為咁造就咗灣仔紅燈區嘅出現。除咗酒吧,唔少專做美軍生意嘅商店亦慢慢出現。除咗韓戰,响六十年代越戰時期,香港又成為咗美軍補給嘅地方,唔少訪港美軍就响灣仔一帶娛樂消費。灣仔娛樂事業興旺起嚟,背後就係有呢段歷史。

原圖嚟自網絡