由舊大澳警署活化而成 大澳文物酒店

繼續講返東澳古道上面嘅古蹟，如果大家行到入大澳，對廟宇又冇乜興趣嘅話，咁阿史跟住要介紹嘅呢樣古蹟可能就好啱你睇，事關呢座建築係由警署活化而成嘅酒店—大澳文物酒店。

大澳文物酒店嘅前身係大澳警署，呢座位處大澳石仔埗街渡輪碼頭旁邊嘅建築，早喺1902年就已經興建，冇呢座建築物之前，警察只係用一座中式建築嚟做臨時警署。大澳警署落成嘅時候，就只有15個警員負責打擊沿海海盜同埋充當居民之間嘅「和事佬」。期後隨住警員人數嘅增加，就喺60年代曾經加建宿舍。成個警署主要係由兩座建築組成，其中一座就係主樓，入面設有捕房、囚室等特色設施，今時今日都仍然有保留落嚟。

去到1988年，呢座警署被評為三級歷史建築。1996年大澳嘅治安得到改善，就唔再用嚟做警署，改為警崗，仲喺同年關閉，直到2012年先開幕活化成酒店。