現存唯一郵政建築法定古蹟—舊灣仔郵局

喺之前介紹過嘅「四環九約」入面，有好多百年歷史古蹟都好值得大家慢慢欣賞，今朝阿史就介紹過十九世紀嘅畫像郵票，依家就想同史友們講下呢座位於灣仔嘅百年法定古蹟，舊灣仔郵局。

舊灣仔郵局位處灣仔區皇后大道東221號，成個建築平面呈一個曲尺形，係喺1912年至1913年間開始興建，去到1915年先建成，係香港現存歷史最悠久，而且亦都係唯一一座被列為法定古蹟嘅郵政建築物。

講起呢座郵政建築，喺佢未興建之前，同樣嘅位置原本係一座警署，只係1903年果陣警署搬去第二個地方，同樣嘅位置就由潔淨局接手，起咗一座有公共廁所，但亦都用咗十年左右就決定拆卸。依家有成百幾年歷史嘅舊灣仔郵局已經冇郵政服務，喺1990年被列為法定古蹟，經過保養同埋活化，被改建成環保署屬下「環境資源中心」嘅「環保軒」，繼續發揮歷史建築嘅作用。