「南洋首富」張弼士

提起潮汕鐵路，阿史就想介紹下當中一個促成興建鐵路嘅靈魂人物，佢就被稱為「南洋首富」嘅張弼士。喺佢提出《招商承辦工農路礦》、《招徠僑商興辦鐵軌支路》嘅提議之前，佢其實係擔任緊「大清國駐檳城第一任副領事」。

到底呢位清朝同民國年間嘅實業家有幾巴閉呢？1841年出生喺廣東潮州府大埔縣嘅張弼士，以16歲之齡就隻身去南洋搵食。佢先去印尼雅加達米店做勤雜工，努力咗一段時間之反就先後去過蘇門答臘、爪哇創辦墾殖公司，後來搵到足夠嘅資金仲去埋檳城、雅加達開設佢嘅遠洋輪船公司。唔單止咁，佢連藥行都有做埋，香港、廣州同埋新加坡都曾經有佢開設嘅藥行。講到佢最出名嘅一樣生意，就係喺煙台種植葡萄，仲整埋一隻「張裕葡萄酒」出嚟。

而去到1893年，呢位實業家就開始做埋官，擔任「大清國駐檳城第一任副領事」。喺佢被任命為督辦鐵路大臣（1907年）之前，其實張弼士就已經大力喺廣州發展藥行、機器織布廠。冇幾耐，佢憑住佢嘅生意同埋財富已經被人稱為「南洋首富」，據估計佢嘅身家高達8000萬白銀，亦即係清朝一年嘅國庫收入。