林則徐係我國著名民族英雄,因為佢主張嚴禁鴉片同抵抗西方勢力對對華侵略,為後人所敬重。咁史友們有無諗過,點解道光皇帝會搵林則徐去主持禁煙事務呢?

以前阿史都提及過,道光年間鴉片流入令到清朝產生唔少社會問題,包括國民身體健康、白銀外流等,令到曾經食過鴉片嘅道光皇帝不得不思考全國禁鴉片。對於禁鴉片一事,朝廷中就有嚴禁同弛禁兩種主張,嚴禁就係完全禁止,即人人都唔可以買賣同吸食;弛禁就有限度禁止,即有啲人符合條件就可以買賣同吸食。當時全國二十八省將軍、總督同巡撫,就只有九個名督撫贊成鴻臚寺黃爵滋禁鴉片嘅主見,最終道光皇帝決心召林則徐入京商談禁鴉片事宜,更封佢為欽差大臣到咗廣東查封鴉片。

至於點解林則徐為「被選中的人」呢?就係因為佢响先後响江蘇、湖廣成功禁鴉片。响佢出任江蘇巡撫期間,已經上奏朝廷(見《會奏查議銀昂錢賤除弊便民事宜》),力陳鴉片買賣造成白銀外流等問題。後嚟佢响出任湖廣總督個陣,為咗力爭朝廷全面禁煙,於是率先作出動作,提出六條具體禁煙方案,更响湖北起獲煙膏煙土1.2萬餘兩。由於佢响禁鴉片工作交到成績,於是道光帝就召佢去北京商討禁煙大事。

原圖嚟自網絡