新界五大族—彭氏

尋日阿史就同史友們講到，有一班粉嶺居民當年因為不滿石湖墟多收秤佣同埋公秤唔準確等問題，而建立一個新墟—聯和墟，而促成呢件事嘅主要就係新界五大族—彭氏。

據彭氏族譜記載，佢哋嘅先祖彭桂原藉係江西宜春，喺南宋嘅時候就移居到粉嶺龍躍頭，早年都仲係人丁單薄，算唔上係一個大族，於是就要不斷搬遷，最後就定居喺粉嶺。彭氏嘅後人喺粉嶺建立咗粉嶺圍，當中就有正圍、北邊村同埋南邊村，由於人口繁衍到成4,000人，所以仲有部分嘅後人術居到上水掃管埔村、大埔汀角村呢啲地方。

彭氏早年仲未係新界五大族，咁到底幾時先開始有變化呢？答案就係九廣鐵路建成之後。原來彭氏定居嘅位置既喺粉嶺站，後來又有沙頭角支線嘅出現，令到彭族喺商貿方面得到好大嘅幫助。而且去到1940年代之後，彭族聯合沙頭角、打鼓嶺、大埔一帶嘅村落建立咗聯和墟，呢個現代墟市嘅出現，亦為彭氏帶嚟唔少財富。