如果讀過明代歷史嘅史友,都應該知道明末有兩大民變領袖,一個係李自成,另一個就係張獻忠。張獻忠曾經响明末時割據四川,建立大西政權,但後嚟政權覆亡,佢自己亦被清兵所殺。呢位大西皇帝可以話充滿傳奇性,除咗屠蜀殺人無數外,傳說中嘅「千船沉銀」嘅故事都相當出名。最近,呢個傳說中嘅寶藏又有新發現喇!

四川彭山江口明末戰場遺址(即「千船沉銀」之地),最近完成咗階段性發掘工作,掘出嘅過萬件文物當中,發現咗「蜀世子寶」金印。根據《明史》記載,當時冊封親王(包括藩王)時通常都會用到金冊或金寶(金印),作為佢哋响藩地發佈政令、以及同京城書信往來信鑒之用。今次搵到呢個金印,係國內首次發現明代世子金寶嘅實物,對研究明朝初期藩王嘅分封制度有好大價值。

原圖嚟自網絡