喺介紹過「九龍十三鄉」同埋「九龍四山」之後,阿史就想再講一講呢個範圍入面嘅一啲地方,其中一個就係叫油塘。

喺行政區域上嚟講,油塘其實屬於觀塘區,現時就主要係一個住宅為主嘅區域,區內亦只係得返少量嘅工業大廈。睇到呢度,史友們可能都會有個疑問,就係油塘呢個地名到底係咪真係同油有關呢?

其實喺1940年代之前,油塘呢個地方仲係冇乜發展,只係去到1950年代,喺油塘北邊嘅茶果嶺,除咗打石之外仲多咗個油庫,叫做「亞細亞油庫」專門用嚟儲存石油。據講油塘早期並唔係叫做油塘,而係叫做「游塘」,早喺1924年嘅軍部地圖就有記錄呢個名。而後來亦都有「馬油塘」嘅講法。至於點解會叫做「油塘」,就係因為亞細亞石油公司起咗呢個油庫,所以傳下傳下就由「游塘」變「油塘」喇!

原圖嚟自網絡