喺九龍十三鄉入面,有一條位於鯉魚門、有百年歷史嘅鄉村,叫做「三家村」。據講三家村並唔係得個名,佢最早成村果陣,可能真係同「三家人」有關。

位於油塘同埋鯉魚門一帶嘅「三家村」到底係幾時開村?呢點喺冇文獻記載之下就好難再去考究,但最早嘅三家人一直都流傳兩個講法:第一個講法就係指呢三家人分別係姓張、劉同埋連;至於另一個講法就係話呢三家人係姓溫、陳同埋劉。無論邊個講法都係同三家人有關,所以呢條村就被稱為三家村。

喺早年嘅鯉魚門最馳名嘅其實唔係海鮮,反而係「九龍四山」所出產嘅石,當年就有唔少客家人嚟到呢度立村打石維生。喺石礦場出產嘅石好多時侯都係用船運,賣到廣東、台灣等地,而三家村一帶就係負責利用船隻遠銷。隨住1967年香港政府不再為石廠續牌,打石呢個行業亦都沒落,鯉魚門就開始轉型賣海鮮,全盛時期渡船碼頭仲有十多艘海鮮艇。

原圖嚟自網絡