日本侵華 中華民族血淚史

呢排香港教育系統好似出現咗唔少問題，特別係關於歷史教育方面，呢兩日又疑似出事。

話說網上流出疑為香港考評局高級職員响社交貼出「沒有日本侵華，哪有新中國？忘本呀」嘅荒誕言論，嗰幾句話係呢位仁兄响面書轉載一單內地新聞時自己加嘅幾句評語，段新聞大概係講鄭州有人迎親時著住昔日日本皇軍軍服，之後被捕。史友們睇到呢度，就知點解呢位職員出事。

三十年代開始嘅抗日戰爭，呢段歷史可以話係有血有淚，讀過中史都知，中國軍民响抗戰中死傷無數，為嘅就係抵抗日軍佔領中國全境，最終响1945年隨住日本投降，中國亦响保住咗家國河山。雖然歷史事件係一環扣一環，但咁簡單化咁將日本侵華同新中國拉上關係其實唔恰當，因為咁樣寫，唔熟歷史嘅人容乜易以為共產黨當年係同日軍聯盟合作。而且呢番言論出自一位曾為中史科老師嘅考評局高級職員，無論係乜嘢政治立場都對唔住抗戰中犧牲嘅軍民。