用貴重紅砂岩興建—居石侯公祠

繼續同史友們介紹新界五大族入面嘅歷史建築，今次阿史就想講下呢座位於河上鄉，被列為法定古蹟嘅侯氏公祠—居石侯公祠。

據侯氏族譜所載，呢座公祠喺明朝（一三六八至一六四四年）末年就已經開始興建，係為紀念佢地十七世祖候居石而建嘅，現時已經成為上水河上鄉嘅地標。居石侯公祠曾經喺清朝乾隆廿七年（一七六二年）進行重修，公祠主要用作河上鄉村民祭祖同埋舉行傳統儀式，亦都係村民日常聚會嘅地方，亦曾經做過村校。

呢座面積奇大嘅傳統建築係三進兩院式建築，前院就有廂房，中進就係供奉歷代祖先嘅神位。公祠外部嘅屋脊同埋山牆都有唔少精緻裝飾，內部嘅橫樑、斗拱亦有吉祥圖案雕刻。而講到最特別，當然就係正面鼓台同埋門框，都係用傳統中式建築貴重嘅紅砂岩嚟整，反映到當年侯氏嘅富裕程度。