呢排香港教育界唔知做乜，好似每個星期都有新聞爆出嚟，呢排仲特別多同中國歷史有關。呢兩日先討論完考評局高層嘅謬論，又有新聞關於考評局。今次輪到文憑試世界歷史疑似出事喇！

點出事呢？就係其中一題題話，要考生睇完資料之後，問佢哋同唔同意「1900-1945年間，日本為中國帶來的利多於弊。」呢個講法。嘩！基本上呢個唔係同唔同意嘅問題（因為有嚟自教育界嘅議員話答不同意答得好一樣有分），而係作為國民嘅原則問題。記得阿史個大學老師講過，話每個民族嘅歷史都會有「禁忌」，最簡單理解就係唔可攞嚟玩或者試探底線。佢當時舉嘅例子就係唔少歐洲國家而言視納粹為禁忌，唔可視納粹如兒嬉，納粹一詞亦唔可以同正義掛勾。原因好簡單，就係二戰時納粹德國帶俾歐洲各國戰爭同苦難。

同一道理，响二十世紀初期日本對中國虎視耽耽，三十年代開始更加緊侵華步伐，侵華期間又不斷殘殺中國百姓，响佔領區實行恐怖統治，中國軍民為咗避免亡國不惜犧牲保家衛國。日本侵華對中華民族而言絕對係悲劇，如果試卷係問同意唔同意「日本為中國帶來的利多於弊」，阿史真係想問下二十世紀日本侵華歷史點可以同「利」字扯上關係。

尋日到今朝，阿史唔少老師朋友都同阿史講，問啲咁嘅問題真係黐線。