英華書院主持人 漢學家理雅各

提到香港早年嘅教育機構同埋報業，都會有英華書院嘅名，而要介紹英華書院，一位叫做理雅各嘅蘇格蘭漢學家就當然需要介紹。

理雅各其實係呢位漢學家嘅漢名，佢真正嘅名係叫做James Legge，佢唔單止係研究漢學同埋主持英華書院，佢仲係牛津大學嘅教授，拎過著名嘅法國漢學儒蓮獎。理雅各出生喺蘇格蘭一個富裕嘅家庭，喺1839年就被英國基督新教派公理宗嘅倫敦傳道會派駐馬六甲主持英華書院，後來英華書院遷到香港，佢亦都去到香港擔任第一任嘅校長，所以佢同香港早年嘅教育好有關係。

除此之外，理雅各仲從事唔少翻譯中國經典嘅工仍，喺1861年至1872年間，佢就相繼出版過《中國經書（The Chinese Classics）》五卷一共八本包括《論語》、《大學》、《中庸》、《孟子》、《書經》、《詩經》及《春秋左傳》，後來就連《書經》、《詩經》、《孝經》、《易經》、《禮記》、《道德經》、《莊子》都有繼續出版。