沙田新市鎮擴展部份—馬鞍山

阿史早前就同史友們介紹咗香港三代嘅新市鎮，當中沙田就係比較早期1973年開始發展嘅一個新市鎮，屬於第一代新市鎮。而去到1980年代，呢個新市鎮就有一個擴展嘅部分開始發展，就係馬鞍山喇！

現時以住宅區為主嘅馬鞍山，城市規劃上同沙田新市鎮好唔同，而時間上亦都係同天水圍以及將軍澳第三代新市鎮同期。雖然話係新市鎮嘅擴展部分，但馬鞍山就曾經被發現喺新石器時代晚期去到南宋都有人類活動留低嘅遺存，而嚟到近代就係一個工業重鎮，專門係用嚟開採磁鐵礦，只係後來開礦成本不斷增加，政府先決定將呢度發展成新市鎮

喺地理上嚟講，馬鞍山位於沙田區東北部，同沙田區係以一條梅子林路做分界，現時嘅馬鞍山自己區內亦都有「鎮中心」，以馬鞍山站為一個集中點，鄰近有大型嘅商場、公園、體育館等公共設施，亦都有恒安邨、耀安邨等公共屋邨，亦有居屋及夾屋，當然唔少得私人屋苑，絕對係一個大型住宅區。