甲骨文嘅發現令到商朝變成信史年代？

早排阿史就喺度同史友們介紹過「虞夏商周」，當中虞夏仍然係傳說時代。其實，喺甲骨文被發現之前，商朝嘅歷史都仲未係信史。

甲骨文，又叫做契文、甲骨卜辭，係商朝晚期王室用於占卜同埋記事嘅文字，由於主要都係刻喺龜甲或獸骨上，所以就叫做甲骨文。呢種文字係東亞暫時發現最早嘅一種成體系嘅載體，只係大部分文字都仲未被解讀出嚟。

甲骨文被相信係上承原始刻繪符號，而後來嘅西周文字亦都係喺由此得到啟發。有學者就相信，甲骨文仲未係最早嘅文字，喺佢之前應該仲會有一種更原始嘅文字。而關於最早嘅記載，其實晚清嘅時候就已經有一位金石學家王懿榮喺光緒二十五年（1899年），喺來自河南安陽甲骨上發現甲骨文。安陽亦即係商晚期國都遺址「殷墟」所在地，隨後嘅百幾年，就有唔少考古發掘喺河南、陝西其他地區出土超過十萬塊甲骨，令到呢個原本唔肯定嘅朝代變成信史。