睇香港嘅地名,唔多唔少都會令人諗起以前嘅地形,就好似「深水埗」、「長沙灣」呢兩個地方,就會令人聯想起海邊。年輕一代唔講真係未必知,原來深水埗以前真係喺海邊,而且仲有個碼頭。

位於通州街與北河街交界嘅深水埗碼頭喺1924年開始啟用,係區內好重頭嘅一個碼頭,專門用嚟提供渡輪服務畀當區居民來往中環,附近仲有一個巴士總站,係上世紀20年代到70年代人口好高嘅一個地方。深水埗碼頭最初嘅航線係來往中環,後來1950年就加設上環威利麻街渡輪服務,之後仲有埋來往澳門嘅服務,相當巴閉。

後來隨住中港碼頭1988年啟用,再加上乘客量十分高,當局就決定喺欽州街對開進行深水埗第一期填海工程,興建南昌邨;原有嘅碼頭就喺1978年6月25日搬到欽州街,當時仲係全港首個安裝電動閘出口嘅碼頭。

冇幾耐,隨住巴士路線同埋港鐵嘅開通,令到來往中環渡輪服務乘客量銳減,最後喺1992年6月1日取消,深水埗碼頭亦都同日關閉。

原圖嚟自網絡