西環至中環海旁填海計劃

早喺十九世紀中期，聚居喺港島嘅英國人就已經意識到香港土地好快會唔夠用，特別係唔少政府機構集中嘅中環，早喺1855年就已經有香港總督寶靈倡議由中環填至東角嘅寶靈填海計劃，但就喺一眾持有海旁物業嘅英國商人反對之下令到計劃告終。

喺西環至中環海旁填海計劃之前，其實當時港府就決定先喺上環同埋西環進行填海，工程由1868年開始，去到1873年完成咗寶靈海旁西。咁西環至中環海旁填海計劃又係點樣出現呢?原來去到1875年，當時港府就已經建議喺西環至中環一帶海旁填海，但點知就因為反對聲太多，再加上經費不足而被迫暫時停止。

到咗1887年7月，政府就再次提出呢個方案，當時就得到到立法局非官守議員暨九龍倉公司大班保羅遮打支持，令到計劃可以喺1888年落實，並且喺1890年開始，亦都因為咁而令到港島西環到中環一帶得到唔少填海地。當時為咗紀念港督德輔任內推動填海計劃，工程後就將寶靈海旁西和寶靈海旁中改稱為德輔道西及德輔道中。