早排阿史就同大家介紹完中國鐵路史上嘅開端，第一條中國自行修建同埋運營嘅鐵路唐胥鐵路，有史友就想阿史介紹埋吳淞鐵路，咁就當然冇問題啦！

吳淞鐵路，係中國境內第一條近代化嘅鐵路，建於1876年，專門用嚟連接上海至吳淞路段。吳淞鐵路全長只有14.5公里，係一條輕便窄軌鐵路，沿線橋樑都係木結構，全線就只有三個站分別係上海站、江灣站同埋吳淞站。

早喺1825年英國就已經完成世界上第一條商業鐵路，雖然1863年嘅時候中國嘅李鴻章都提出過想興建上海至蘇州間鐵路，但就得到「嚴加拒絕」嘅回覆。雖然吳淞鐵路算係第一條近代化嘅鐵路，但其實成個興建嘅過程係冇得到中方嘅允許。喺1869年代開始，上海租界入面嘅英國商人就有興建鐵路嘅諗法，1865年仲曾經上報畀上海道台應寶時，但就被拒絕。

後來，英國人就直頭唔通報，決定先斬後奏喺1872年開始修建一條由吳淞碼頭到上海嘅鐵路，並且得到多家英國工商團體參與，仲呃當時嘅上海道台沈秉成話將會興建一條馬路。雖然當中面對資金不足、徵地等問題，但最後由怡和洋行出手解決，喺1875年7月1日正式通車。

吳淞鐵路通車之後，當地人極為不滿，亦都引起清政府嘅注意，最後就需要同英國商人談判，以二十八萬五千兩白銀購回鐵路權，1877年鐵路路軌全部拆除。

原圖嚟自網絡