新界北區廢止嘅鐵路線 沙頭角支線

之前同史友都介紹過唔少九廣鐵路嘅歷史，當中仲講過舊大埔墟嘅火車站以及尖沙咀嘅鐘樓。而喺呢條歷史咁悠久嘅鐵路上面，其實曾經仲有條沙頭角支線。

喺昔日嘅九廣鐵路上面，新界嘅北區就曾經有一段由粉嶺通往沙頭角嘅鐵路段。呢條支線喺1912年開通，全線都係單線行駛，並且由頭到尾都係以蒸汽機車運行，當年用過嘅W.G. Bagnall 0-4-4T 蒸氣機車今日仲保留咗喺鐵路博物館。

早喺1911年初期，當時嘅北約理民府就曾經提議修築鐵路連接沙頭角，而政府亦都接受呢個建議，並且以牛車和人力運送建造鐵路所需嘅材料到呢個地方。支線設有五個車站包括粉嶺、洪嶺、禾坑、石涌凹及位於邊境車坪街，當時全程票價為2角，最初一年就有42,940人次乘搭。而沙頭角支線遺蹟已經唔太可能搵到，大概就只係得返洪嶺站。