近排同史友們講起唔少香港嘅歷史建築，阿史就諗返起以前去廣州旅行都鍾意參觀當地嘅古蹟。所謂「未上五層樓，未到廣州城」，其中一個成日去嘅地方就係「五嶺以南第一樓」—鎮海樓。

鎮海樓原名叫做望海樓，因為有五層，所以又叫做「五層樓」。呢座位於廣州市越秀山小蟠龍岡上嘅歷史建築建於明朝洪武十三年，即係1380年，如果冇被破壞過，計計埋埋都真係幾百年歷史。

點解會喺廣州起呢座建築物呢？相傀當時永嘉侯朱亮祖想擴建廣州城，就將子城、東城、西城合併，並且喺當時嘅越秀山城牆上面起一座五層高嘅樓，即係「鎮海樓」，寓意越秀山。後來，明成化年間就因為火災而重修，清朝又因為三藩之亂被燬，去到民國又被桂系軍閥破壞，真係多災多難。

宜家大家所見嘅鎮海樓，就係1928年重新修建，建築內部就已經用上鋼筋混凝土，但明代舊磚石牆壁就仲有保留落嚟。鎮海樓喺唔同年代都係廣州重要嘅一個地標，清代就係羊城八景之一，又被譽為「五嶺以南第一樓」、「嶺南第一勝覽」等等，如果大家行過路過，不妨入去睇一睇啦！

原圖嚟自網絡