早排阿史就同大家講過金鐘以前有個軍火庫,既然有得軍火庫,咁有埋兵營都唔係一件出奇嘅事,而且昔日金鐘呢個兵營入面有唔少建築物都被保留咗落嚟,部分仲被列為一級歷史建築。

阿史想介紹嘅就係域多利兵房喇!呢個地方曾經係昔日英軍好重要嘅軍營,位處今日紅棉路、堅尼地道一帶,附近仲有美利軍營同埋威靈頓軍營。域多利兵房早喺1840年代就開始逐步興建,係英軍喺香港最早期興建嘅軍營,全盛時期就曾經有過三十幾座建築物,認真誇張。要講到最早期嘅建築物,最廣為人知嘅應該就有被稱為旗杆屋嘅舊三軍司令官邸,而唔少今日位處香港公園內嘅建築物,都係喺二十世紀先開始逐步興建,就好似卡素樓、華褔樓、羅年信樓等等,係用嚟做已婚軍人嘅宿舍。

直到1979年3月30日,駐港英軍將域多利軍營嘅土地交還畀港府,入面唔少軍事建築都被拆卸,剩低落嚟嘅幾座建築物都被活化保留落嚟,分別用作藝展中心,創意藝術工作坊、遊戲治療活動等用途。

原圖嚟自網絡