喺介紹到早期香港公共屋邨嘅歷史果陣，經常都會提到一個人人名，佢就係廖本懷，唔少著名嘅屋邨好似馬頭圍邨、和樂邨、福來邨及華富邨等，都係由佢設計。而更加巴閉嘅係，廖本懷仲係第一位出任政務司嘅華人。

廖本懷出生喺台灣雲林，喺台灣成長並且完成基礎教育，本來打算去到美國繼續升學，但就喺親戚推薦之下喺1947年入讀香港聖若瑟書院，後來仲成功考入香港大學新開嘅建築系，成為第一批獲頒授建築學學士嘅學生，仲去過英國修讀園境建築。

畢業之後廖本懷先係擔任講師助教，去到1960年先加入政府，任職屋宇建設處負責參與新建屋計劃樓宇設計，喺華富邨嘅設計上更加體現到佢嘅功力，令到大部分單位都可以面海之餘，仲運用咗首創雙塔式大廈令平整地基工作較為方便。

冇幾耐，佢先升任屋宇建設處處長，1973年，他成為首任房屋署署長，並推行居者有其屋計劃。去到1980年代，廖本懷已經係當時政府重要嘅官員之一，兼任立法局、行政局官守議員，最高峰嘅時候仲做埋政務司，係第一位華人做到呢個職位。

原圖嚟自網絡