喺中上環一帶,有一間歷史悠久嘅茶室叫做陸羽茶室,細個嗰陣阿史都誤會過,以為呢個係創辦人嘅名,後來先知道陸羽其實係被譽為係中國嘅茶神。

陸羽,號茶山御史,相傳係由智積和尚喺河邊收養之後,交由他人養大成人,呢個故事都相當有傳奇色彩。據講係有一日,寺入面嘅和尚聽到出面有唔少大雁傳嚟嘅聲,於一個叫做智積嘅和尚就行出去睇一睇,就發現當時有三隻大雁喺圍住一個嬰兒喺度叫,仲將羽毛覆蓋到佢身上。智積將小朋友送到檀越李儒公果度收養,當時陸羽呢個名仲未出現。而到咗陸羽七歲嘅時候,李儒公因為要返鄉下,陸羽就主動投奔智積和尚,當時就用《易經》為自己占卜,卜出「陸羽」呢個名。

喺龍蓋寺嘅呢段日子,陸羽志於儒學,亦都學識烹茶、到戲班學戲。亦都係因為佢戲曲嘅天份,令到佢識到竟陵太守李齊物、鄒夫等人,一齊品茶鑒水,後來仲去埋浙江湖州呢個產茶區,著《顧渚山記》、《茶經》等經典,當時陸羽同埋皎然都已經係茶葉名家。《茶經》一書問世後,就受到歷代唔少人嘅喜愛,宋代陳師道仲為呢本作品寫序:「夫茶之著書,自羽始。其用於世,亦自羽始。羽誠有功於茶者也!」

原圖嚟自網絡