「黃河奪淮」係乜嚟？

話說近排內地嘅水災災情都好嚴重，特別係長江流域唔少地方都受到洪水影響，而喺歷史上除咗長江水患嚴重之外，黃河嘅水災同樣都係歷代帝皇需要治理嘅。

欲治天下必先治黃河，咁到底黃河嘅水災有幾犀利呢？答案就係犀利到出現埋「黃河奪淮」。所謂嘅「黃河奪淮」，就即係指喺1194年到1855年間發生嘅黃河奪取嘅淮河河道作為出海口呢件事。淮河同黃河一樣都係外流河並且有自己嘅入海水道，喺宋朝之前淮河向來並冇太大嘅水患，呢點為兩淮帶嚟肥沃嘅土地，亦都盛傳「兩淮水利甲天下」、「走千走萬，離不開淮河兩岸」。咁到底「黃河奪淮」係點出現呢？

歷史上發生過幾次黃河侵奪淮河流域嘅情況，但為期比較短而且並無對河道造成太大影響，大抵相安無事。。而稱得上「黃河奪淮」呢一次，係自從1194年黃河第四次大改道後，淮河河道大受影響並且令到淮河入海口東移，主流被迫流入洪澤湖。黃河奪淮之後，黃河嘅泥沙阻塞河道，，淮河下游失去入海水道，除咗發生嚴重水災，亦都喺安徽喺往後幾百年間出現過百次大小旱災，影響深遠。