曾經存在過的島嶼—奇力島

尋日阿史同就大家介紹過香港開埠初期所建設過嘅一樣水利工程，灣仔嘅寶靈頓運河，而呢條運河嘅前身係黃泥涌，當時就有唔少泥沙經今日鵝頸橋位置流入維多利亞港，沖積成一個島，名為奇力島。

奇力島係港島一個曾經存在過嘅島嶼，又叫做燈籠洲，位處東角以北，係以一位英國皇家海軍測量工程師奇力（Kellett）命名，據講呢個島面積只有0.01平方公里。雖然島仔細細，但係由此佢嘅位置有戰略嘅意義，喺香港開埠初期就被用作港島面對九龍半島嘅前哨，喺1841年就有過一個堡壘，駐兵守衛維港東部，去到1854年仲加設過三門大炮，直到1860年為止。

奇力島後來就先被改建成彈藥庫，1938年就成為皇家香港遊艇會大樓嘅所在地，日佔時期就被日軍用嚟儲存燃料、大炮及彈藥。隨住戰爭結束，加上港島嘅發展，銅鑼灣填海工程展開，1951 年奇力島就被一條堤道連接，1969年更加因為修建海底隧道而同港島完全合併。