華北五省自治

又到七月，每年呢個時候唔少關於日本侵華嘅歷史文章都會出現，因為從七七事變至九一八事變再到南京大屠殺，由七月去到十二月。不過今次阿史想介紹嘅呢段歷史，响教科書只會輕輕提及，就係「華北五省自治」。

話說日本帝國主義展開侵華、佔領中國東北之後，繼續向華北進犯。响1932年扶植「偽滿洲國」，之後加快入侵華北嘅步伐。1935年，中日兩國口頭達成「何梅協定」，日本就改變策略，推動華北五省自治，即係華北特殊化，令華北地區嘅河北、察哈爾、綏遠、山東、山西五省脫離中國。1935年，日本扶植殷汝耕响河北東部成立「冀東防共自治委員會」，宣佈脫離國民政府獨立，後嚟改為「冀東防共自治政府」，史稱「冀東事變」。不過，呢啲事引起南京政府同民眾好大不滿，華北五省自治運動最後以國民政府設立冀察政務委員會而平息。

不過，日本對華北嘅蠶食並無因為咁而停止，响日本人策動下，1936年河北、察哈爾兩省實行部分自治，察哈爾境內成立「蒙古軍政府」，基本上响七七事變前，日本已經控制咗華北大部分地區。