【傳奇男女】護國大將軍—蔡鍔

早幾年大台就有套戲叫做《蔡鍔與小鳳仙》內容大概係講緊小鳳仙點樣幫蔡鍔暗地裡進行反袁嘅工作，但歷史上幫蔡鍔手嘅並唔係小鳳仙。關於呢位護國大將軍嘅故事真係有唔少，阿史今日就同大家介紹下佢啦！

蔡鍔係一位清末民初政治家、軍事家，早年就參與過響應辛亥革命，後來發動過反對袁世凱復辟帝制嘅護國戰爭，所以就被稱為護國大將軍。蔡鍔年幼果陣家境唔太好，17歲入讀長沙學堂，18歲東渡日本留學，冇幾耐就被雲貴總督李經熙提攜做雲南新軍協統。佢就喺辛亥革命嘅時候發動兵變，宣告雲南獨立，後來被袁世凱以大總統名義任命蔡鍔就做埋雲南都督。

唔講未必知，其實孫中山二次革命果陣，蔡鍔係公開反對孫中山，亦都因為咁而受到袁世凱重用，咁到底點解蔡鍔又會加入反袁陣營呢？原來當袁世凱稱帝嘅時候，蔡鍔係唔同意，佢所認同嘅係共和制。1915年，蔡鍔喺梁啓超幫助下逃離北京返到雲南，組織討伐袁世凱護國軍，蔡鍔護擔任國軍第1軍總司令，展開護國戰爭爆發，令到袁世凱取消帝制。民間稱蔡鍔做再造共和第一人，而蔡鍔喺戰爭之後冇幾耐，就因為結核病而過身，享年35歲。