兒童讀物方面，百科全書相信會係唔少史友由細讀到大嘅書籍，呢度講緊嘅百科全書主要都係由西方引入，咁喺古代中國嘅文人到底又係睇緊啲乜？《永樂大典》就係其中一樣喇！

《永樂大典》號稱係中國歷史上、甚至係世上最大嘅一部百科全書。呢部正文有成22877卷、目錄60卷，11,095冊，約3.7億字嘅書籍，係喺明永樂年間編撰。喺明太祖洪武二十一年，當時佢就想修纂類書，商議「編輯經史百家之言為《類要》」，但呢本類書未修成，就到咗明成祖即位。明成祖就想整理古代嘅知識，識搵嚟解縉等147人修書，當中設定咗一個宗旨，就係「凡書契以來經史子集百家之書，至於天文、地誌、陰陽、醫卜、僧道、技藝之言，備輯為一書，毋厭浩繁！」

呢本百科全書叫得做《永樂大典》就當然係喺永樂年間修成，最初叫做《文獻集成》，但由於明成祖覺得內容未夠多，於是喺永樂三年再次命太子少傅姚廣孝、解縉、禮部尚書鄭賜監修以及劉季篪等人重修，今次就召集咗2,169人編寫，動用晒文淵閣全部藏書。呢本書喺永樂五年（1407年）定稿進呈，亦都成功通過，明成祖親自為序，命名為《永樂大典》。

永樂年間修訂的《永樂大典》原書只有一部，現今存世的皆為嘉靖年間的抄本。雖然呢本書係咁有價值，但歷年就受到唔少破壞，既有喺明代佚失、又有喺英法聯軍之役被劫掠，亦有流落到民間。現存《永樂大典》正本不知去向，副本僅存418冊823卷，散藏喺9個國家和地區嘅34個公私收藏機構，大約只係原書4%。

原圖嚟自網絡