美國糾正歷史錯誤 鐵路華工被列入勞工部名人堂？

尋日阿史就介紹到由華工血汗付出建造嘅太平洋鐵路，而喺呢條鐵路建成完之後嘅竣工儀式，鐵路公司同埋政府竟然冇邀請到當時佔咗九成工人嘅華工參加，甚至喺儀式上致謝詞都冇提到佢哋，呢點亦都被視為係美國所犯嘅歷史錯誤。時隔145年之後，美國先至識得糾正歷史錯誤。

呢班中國工人早年係被「賣豬仔」而飄洋過海去到美國修建鐵路，亦都係因為佢哋不畏艱辛，所以先可以喺極端環境以及缺乏機器嘅情況下完成到第一條橫貫東西岸嘅太平洋鐵路，當中有接近一成嘅華工都客死異鄉。喺鐵路建成之後，美國就喺1882年通過《排華法案》，阻止華人移民到美國，有工人家庭被迫分離。

時隔接近一個半世紀，喺太平洋鐵路通車第一百四十五個周年，佢哋呢份被忽視嘅貢獻喺2014年就被美國政府承認。美國勞工部長佩雷斯、副部長盧沛寧及部分華工後代，共同為勞工部名人堂揭牌，宣布鐵路華工成為首批進入該名人堂的亞裔人，承認呢批無名英雄嘅貢獻，將美國華人嘅地位立下里程碑。而呢一次，美國方面自己都認為係糾正百幾年來嘅歷史錯誤。