提到近代比較出色嘅女子，唔少人都會第一時間諗到呢位民國初年才女，同時都係同國徽設計有莫大關係嘅人，佢就係林徽因。

林徽因出生喺浙江杭州，父親係林長民，叔父林覺民，佢本名係「徽音」，但後來因為避免同一位男性作家林微音混淆，自己改名「林徽因」。既然叫得做才女，當然學術上有過唔少出色嘅表現。喺1916年，林徽因就到咗培華女子中學讀書，後來就認識咗梁啓超之子梁思成，去到英國生活，期間就對建築系產生興趣，林徽因去到美國賓夕法尼亞大學學習建築。只係，當時建築系唔收女學生，佢就只好去讀美術系。

林徽因嘅成就當然唔止喺讀書方面，佢喺1925年就同聞一多、梁實秋、梁思成等籌建「中華戲劇改進社」，交流戲劇藝術；後來就同梁思成結婚，到處考察古建築，並且開始創作詩歌、小說、散文，當時就已經被人稱為才女。而提起林徽因，除咗會諗起北京古城，仲會諗到國徽嘅設計。

喺1949年，林徽因獲選為中華人民共和國國徽設計組成員，當時佢自己都有帶同清華大學設計組提出大孔玉璧、五星、齒輪、嘉禾、國名組成嘅國徽草案，但後來小組就選擇咗中央美院張仃方案。事後，呢個方案就係由梁思成同埋林徽因一同進行深化同修正，美化咗建築圖案同埋色彩。去到1950年6月20日，全國政協第一屆全國委員會第二次會議決定以清華大學深化嘅第二稿為基礎製成國徽。

林徽因同國徽之間，就係有過呢段故事，而佢唔單止參與設計國徽，仲有人民英雄紀念碑、八寶山革命公墓等等，而喺1955年4月1日，林徽因因肺結核久治不癒，病逝於同仁醫院。

原圖嚟自網絡