尋日阿史就同史友們提到前布政司鍾逸傑,係佢嘅任內有唔少大型嘅基建同埋建屋嘅計劃都係由佢畀意見,而其中一項就係「市區改善計劃」。

「市區改善計劃」係香港房屋協會喺1974年響應當時布政司鍾逸傑嘅建議而推出,當時得到港府提供一億港元長期貸款,並且開展收購舊樓物業。呢個計劃主要有三個目的,第一個就係想改善市區居住環境,第二就係想為市民提供一個現代化嘅居所,第三就係想令到舊社區可以保持到聯繫。

呢個非資助建屋計劃主要係將喺港島同埋九龍一帶,建於1930年代同埋1940年代嘅舊樓進行收購並且重建,希望可以建成樓宇更高、面積更大嘅單位,而且附近再加添一啲配套設計就好似商店同埋社福設施等等。呢個計劃去到2020年為止,就已經發展咗30個住宅項目,提供5,620個單位,唔少都係單幢樓,其中仲有一個有好多座數嘅就係西環七臺入面嘅羲皇臺項目。

亦都係因為呢個計劃令到房協有咗相關收購以及重建嘅經驗,令到後來2002年開始同市建局合作推動市區重建,由市建局透過《土地收回條例》收樓,而房協負責提供安置資源,建築,售樓及售後管理等服務,成個計劃就係咁樣嚟。

原圖嚟自網絡