1973年7月20日，國際著名華裔武術家、截拳道創始人、荷里活首位華人主角李小龍喺拍攝電影《死亡遊戲》期間，猝死喺女星丁佩位於西九龍塘嘅屋企，事件引起極大震撼，佢嘅死因至今依然充滿爭議。

李小龍，本名李振藩，係粵劇丑生李海泉之子，亦是慈善家何甘棠嘅外孫。李小龍出生喺舊金山唐人街東華醫院，年幼時候就喺香港九龍讀書，亦都機緣巧合之下跟隨葉問學習詠春，並且後來以詠春作為一個根本，破除咗唔少傳統武術嘅觀念，創立咗一種新式嘅武術——截拳道。

李小龍嘅武藝固然係出色，佢演藝事業亦都唔簡單，佢既係動作片演員，同時都係功夫片嘅開創人。佢自幼就跟隨父親出演過超過二十部香港電影，去到1959年就去到美國讀書，主修戲劇、副修哲學，並且開始客串當地嘅電視劇，嘗試將亞洲人嘅面孔打入外國。

去到1970年代，就係李小龍功夫片嘅高峰，佢當年得到嘉禾電影公司鄒文懷邀請，返到嚟香港主演以功夫為題嘅電影《唐山大兄》。因為呢套電影大受歡迎，李小龍就隨即主演了《精武門》、《猛龍過江》、《龍爭虎鬥》等，令到佢喺國際間迅速聲名鵲起。

1973年7月20日，李小龍參與演出《死亡遊戲》，猝死喺丁佩九龍塘嘅屋企。雖然佢嘅死因至今仍然眾說紛紜，但當時化驗報告就指死因係「對頭痛藥物（Equagesic）過敏」。

原圖嚟自網絡