早排就同史友們介紹過有「七號差館」之稱嘅西區警署,有史友就想阿史介紹多啲相關嘅歷史建築,咁阿史今次就同大家講下「二號差館」,舊灣仔警署啦!

現址嘅舊灣仔警署其實就唔係第一代嘅警署,第一代嘅灣仔警署早喺1868年啟用,位置上嚟講即係今日嘅灣仔道同東海旁交界。第一代嘅用咗好多年之後,就因為海旁東填海計劃完成,就搬遷到當時真係位於海邊嘅告士打道現址。至於點解會有呢個決定,原因就係因為呢度佔地面積有成7,500平方米,再加上真係位處海邊,可以同時設立警署同埋消防車站等等,功能甚多。

如果大家有經過呢座警署,可能都會覺得幾新淨整齊,但喺1941年日軍侵佔香港期間,呢座警署其實就受過日軍炮擊,損毀都幾嚴重,直到日軍投降之後港府先有能力進行大規模修葺。如是者呢座舊灣仔警署繼續運作,去到1992年就被列為香港三級歷史建築,2009年仲改列為二級歷史建築。

隨住2010年舊灣仔警署搬遷到香港警察總部之後,舊址警署曾經打算改建為特色餐廳,又有指會活化成特色酒店,但就多次遭到司法覆核挑戰,活化計劃仲未有下文,舊址就由網絡安全及科技罪案調查科暫時使用。

原圖嚟自網絡