尋日就同史友們講到李小龍最後一套嘅動作電影《死亡遊戲》,咁有頭有尾,到底第一套由佢擔演主角並且大紅大紫嘅電影又係邊套呢?答案就係唐山大兄喇!

《唐山大兄》並唔係李小龍第一套參演嘅電影,但就係李小龍旅美返港之後,所接拍嘅第一套電影,並且都係因為呢套電影而掀功夫片熱潮。其實早喺1970年代,邵氏兄弟就已經想邀請李小龍返嚟香港拍戲,但因為李小龍提出唔少製作上嘅要求令到邵氏高層唔接受,所以合作唔成事,而當時嘅邵氏行政總裁鄒文懷離職出走,另組嘉禾仲再次邀請李小龍返嚟香港發展。

李小龍呢次就接受邀請,拍攝嘅第一套電影就係《唐山大兄》。咁呢套電影到底係講乜呢?故事背景大概就係李小龍飾演一個喺廣東去到泰國打工嘅後生仔,眼見當地有唔少工人受到欺凌,更有啲工人無故失蹤,直到朋友調查真相被殺害之後,李小龍飾演嘅鄭潮安就出手幫工人,當時就得到「唐山大兄」嘅稱號。但故事仲未完,工廠老闆先係想收買佢,但眼見唔成功仲被李小龍發現包娼庇賭同埋販毒嘅生意,最後只好暗中殺害佢。亦都係呢幕開始,《唐山大兄》就有大量經典功夫場面,令到唔少人著迷。

咁到底呢部電影有幾誇張?單單係講上映果陣,就已經創下當時香港最高票房紀錄,仲獲得各界好評,三腳迴旋連環踢、凌空飛腳等等嘅招式更加掀起功夫熱,亦都被認為係救返成個香港電影工業。

原圖嚟自網絡