近排中美喺外交方面就展開連場角力，美國國務卿蓬佩奧發表演講講述未來對華政策，而呢次演講嘅內容就畀外交部發言人華春瑩批評係「新的十字軍東征」，咁到底史上十字軍東征係件咩事呢？

所謂嘅「十字軍東征」係指一系列由教宗准許而發動嘅戰爭，主要係由當時西歐一啲封建領主同埋騎士對住被佢哋認為係「異教徒」嘅地中海東岸國家發動持續接近200年嘅戰爭。

要知道喺11世紀嘅時候基督教主要係分成兩大派別，分別係以西面以羅馬教廷為中心嘅天主教同埋東面以君士坦丁堡為中心嘅東正教，但其實唔少年代嘅教皇都想將兩派統一。於是喺1095年11月，羅馬教皇喺宗教會議上倡議西歐教徒向東進軍，呢次就係十字軍東征嘅序幕。

十字軍最初係由騎士、商人、農民等受到拜占庭帝國邀請自願組成，由於參與戰爭嘅士兵都有一個十字標誌，所以佢哋又被叫做十字軍，歷史上普遍嘅意見係指佢哋喺接近200年時間入面展開咗前後9次嘅東征，主要係對穆斯林統治嘅西亞地區作出佔領同埋建立基督教國家，對異教徒、其他天主教會以及封建領主都會標籤為「敵對勢力」。

十字軍東征嘅目的最初係被理解成收復被穆斯林統治嘅聖地耶路撒冷，但係隨住安納托利亞對戰後，持久嘅戰役亦都展開。歷代學者就認為十字軍東征雖然係以宗教做口號，但過程中有唔少劫掠，既有滿足宗教上嘅目的，亦有解決經濟問題，同時都係拜占庭帝國私心。對呢場東征，《歐洲中世紀史》就有咁樣一句總結：「十字軍遠征聚合了當時的三大時代熱潮：宗教、戰爭和貪慾」。

原圖嚟自網絡