1919年7月26日，香港爆發咗一場搶米風潮，事件持續到八月底並且出現大規模集體搶劫米舖以及集貨店嘅事件。講起呢場搶米風潮當中真係有唔少原因，要知道當時香港嘅米主要係由暹邏同埋法屬印度中南半島等地入口，但喺第一次世界大戰結束冇幾耐，歐美列強唔少都元氣大傷，更加缺乏糧食，於是以英法為首嘅宗主國都禁止佢哋殖民地出口糧食，於是就令到香港嘅食米供應大減。

唔單止咁，另一邊廂同樣都係以米作為主糧嘅日本，當時國內就受到天災影響，唔少稻米收成都大受影響，就只好喺東南亞一帶搜購食米，呢個舉動就令到香港嘅食米供應更加不足，而日本國內都發生唔係搶劫米鋪事件，就好似圖中呢個畫面咁。

據事後嘅報道，其實香港嘅食米供應唔係真係咁唔足夠，只係有唔少米商都乘機囤積居奇，希望可以推高米價，結果就令當時食米價由批發價每擔3元4角急升至6元7角，至於零售價就升到每擔16元，唔少貧苦市民都大受影響。

喺1919年嘅7月26日，呢一日香港天文台懸掛風球，但唔少貧苦市民都冇工開冇飯食，佢哋聚集咗喺灣仔街市一帶，當佢哋得知米價再次上升嘅時候，就當場一呼百應，先係有200至300名苦力衝入一間米內搶掠共300斤米，後來就有其他苦力同市民搶劫附近祥記、豐益、成源等雜貨店，單單一日就已經有15間米鋪同雜貨鋪被搶走接近2000斤米。

呢個情況冇得到改善，反而引發銅鑼灣、西環、中環一帶都有人參與搶劫，直到政府7月28日宣布承辦及收購所有私人存米，禁止出口食米以及向中國政府發出電函要求中國政府協助解決糧荒，糧荒問題先喺九月完全解決。

原圖嚟自網絡