近排中美關係就再次變得緊張,兩國都互相關閉大使館,咁就令阿史諗起接近20年前發生嘅一件慘案,就係中國駐南斯拉夫使館被美國轟炸。

喺1999年初,當時南斯拉夫解體,原本有六個加盟國,四個宣佈獨立,剩低塞爾維亞同黑山兩國。於是呢兩個國家响1992年4月重組成立南斯拉夫聯盟共和國,中國駐前南斯拉夫大使館改為駐南聯盟共和國大使館,中國駐前南斯拉夫大使改任駐南聯盟共和國大使。

到咗1996年南斯拉夫爆發科索沃戰爭,喺呢場戰爭入面、响科索沃問題上中國係支持塞爾維亞;至於1999年由美國主導嘅北約正式介入戰爭當中,喺南斯拉夫境內不斷進行轟炸。去到1999年嘅5月7日深夜,北約入面嘅美國B-2轟炸機發射咗5枚精確制導炸彈或聯合直接攻擊彈藥,轟炸响塞爾維亞貝爾格萊德嘅中國駐南斯拉夫使館,當場炸死3名中國記者邵雲環、許杏虎和朱穎,多人受傷。

事件震驚全球,唔少國家譴責北約同美國嘅行為,時任美國總統克林頓為此事件向時任國家領導人江澤民道歉。北約對事件嘅解釋係話誤炸,原因係用咗一份美國中央情報局過時嘅地圖,北約同美國都多次對事件表示遺憾同哀悼。但大部分中外媒體以及全球華人對呢個解釋唔多接受,世界各地華人掀起反美潮。最終响同年12月,中美就此次事件賠償問題達成協議,美國政府向中國政府支付2800萬美元賠款。事件發生後,中國駐南斯拉夫大使館,即係後嚟嘅中國駐塞爾維亞大使館歷年都會响當地舉辦悼念活動,貝爾格勒市政府仲喺被炸毀嘅中國使館舊址前豎立紀念牌,緬懷喺北約轟炸中身亡3位中國記者。

原圖嚟自網絡