早排阿史就同大家介紹過由布政司鍾逸傑建議成立嘅一項計劃──市區改善計劃,呢個計劃當時拎到港府提供一億元貸款,對市區樓宇進行收購並且重建,而第一個收購同落成嘅住宅項目就係位處前香港麵粉廠同埋均益大廈第一期之間嘅樓宇,第一期工程完成之後就成為美新樓A座。

呢個位於香港島中西區石塘咀嘅住宅項目,A座1976年落成入伙,B座就係1980年落成。呢個住宅樓高23層,兩座一共提供267個單位,最初係以受到重建項目影響嘅市民優先購買,並且提供優惠價畀佢哋,但點知反應冷淡,A座只係賣出當中70個。最後房協就只好將剩餘單位以市價公開出售,或者係因為樓宇北面可以望到維港,又估唔到反應十分之好,6個鐘頭內火速搶購一空甚至仲出現埋炒樓嘅現象。據當時媒體了解,最初一個單位發售價就只係12萬,但係去到幾日後就已經有人用12.7萬轉賣,呢個逼到房協當時出招例如限制買家付清樓價後先可以將買賣合約權益轉售予他人,並縮短付簽合同交易日期、提高轉名費等阻止炒賣。

可能係因為以上現象,當B座落成之後賣樓果陣,樓價就已經貴咗接近一倍。

原圖來自網絡