提起車公廟,可能唔少史友都會諗起初三赤口必去嘅沙田車公廟,但唔講真係唔知,原來位於沙田嘅車公其實係第三代嘅車公,咁到底香港最早拜奉車公嘅又係邊個地方呢?答案就橫洲喇!

喺橫洲東頭圍嘅二聖宮入面,除咗供奉住南方嘅海神洪聖之外,原來仲有一個相信係香港最古老嘅車公像,亦都係被視為可以驅除瘟疫嘅神明車公。相傳車公係南宋末年宋端宗國舅楊亮節手下嘅一個武將,喺宋帝昺南下逃難嘅時候,車公勤王護駕,與此同時南方疫症連連,但係車公所到之處疫症都得以退散,鄉民為紀念車公生前恩德就建廟供奉。

最先嘅一座廟宇相信就係位於橫洲東頭圍嘅二聖宮,呢座廟宇嘅建成年份不可考,但據廟內文物康熙戊戌年鑄造古鐘推斷,至少就係1718年建成,亦都有學者估計廟宇有600年歷史。可能大家就會有個疑問,到底第二代同第三代車公又係點嚟?

原來喺明代嘅時候,蠔涌就曾經發生疫症,當時蠔涌就諗起車公呢個神明,就向橫洲鄉民借咗車公建廟;至於去到清朝年間,沙田亦都發生疫症,瀝源嘅父老就想向蠔涌父老借車公建廟,但蠔涌父老就只係肯畀佢哋請走車公個孫嘅神碑,就係咁樣形成三代車公。

原圖嚟自網絡