以武則天為題材嘅電影同埋電視劇真係多不勝數，唔少都係以描繪宮廷之中嘅明爭暗鬥，佢點樣成為中國歷史上唯一一位正統嘅女皇帝。唔知史友們又知唔知，喺武則天在位嘅十四年間，佢其實喺陝西乾縣唐乾陵講述李治生平嘅「述聖記碑」旁邊，為自己立咗一塊巨大嘅石碑，歷代都叫呢塊石碑做「無字碑」。

可能有史友會以為呢塊石碑係未完工，但對比起旁邊嘅「述聖記碑」，其實「無字碑」嘅規模就更加大，係由一塊98.8噸完整石塊整成，上面雖然一隻字都冇，但就有齊精美嘅雕刻就好似駿馬、雄獅、雲紋同埋四條螭龍，完全係工藝嘅表現。咁到底點解「無字碑」會無字？呢個就真係千古謎題喇！

歷代以來對於「無字碑」就有幾個比較主流嘅推論，其一就係指武則天係想借呢塊碑嚟讚自己。事關喺佢統治期間，全國上下國泰民安、人民安居樂業，政績就人所共知，與其自己去歌功頌德，不如就「己之功過，留待後人評說」乜都唔寫留返畀後人去評價，既顯示到自己謙虛，又可以留低好印象。

其二就係指佢本人對於稱帝過程於心有愧，喺篡位建立大周呢段經歷始終驚畀世人唾罵，再加上乾陵本來就有李治安葬喺度，一陵葬二帝並無先例，無字碑上應該寫咩稱呼更加難決定，於是就不如乜都唔寫。以上呢兩個就係歷代以嚟比較合理同主流嘅講法，唔知史友們又係點睇呢？

原圖嚟自網絡