提到三年零八個月，提到二次世界大戰香港點樣抵抗日軍入侵，留低嘅事物已能唔多，而可能係最後一位見證呢件事嘅人物喺日前亦都已經逝世，佢就係二戰英軍華籍老兵蔡彼得。

蔡彼得原名蔡炳堯，出生喺1922年嘅9月，日前佢就喺東華醫院病逝，享耆年97歲。佢出生自一個有11個小朋友嘅家庭，童年果陣就喺堅尼地城長大，好細個就出嚟打工幫補家計，亦都因為做過酒店派送員，接受過英語課程培訓。提到佢嘅英勇事跡，就當然同日軍侵占香港呢件事有關啦！

因為當時港府嘅政策，當年18歲嘅蔡彼得就響應政府號召，1941年8月加入駐港英軍，成為香港星加坡皇家炮兵團第17重高射炮連（17th Heavy Anti-Aircraft Battery, Hong Kong and Singapore Royal Artillery）成員。但其實喺訓練開始無耐，蔡彼得就已經要加入戰團。

喺1941年12月8日，日軍就發動咗太平洋戰爭，隨即就展開埋入侵香港嘅計劃。蔡彼得就同佢嘅隊友駐守雞籠灣炮台（Waterfall Bay AA Battery），本來呢個位置就冇太多嘅戰事，但喺12月13日，當時蔡彼得所屬隊伍就發現上空出現日軍戰機，蔡彼得就同佢所屬嘅隊伍以防空炮擊落一架九四式水上偵察機，令到日軍喺戰爭結束之前都唔敢派出戰機嚟到港島一帶。

但係總督楊慕琦喺12月25日下午決定投降，避免成為日軍俘虜，蔡彼得就只好聽從上司命令，銷毀軍服立刻回復平民外貌，並且展開地下抵抗。佢既有幫過英軍到金鐘海軍船塢從事情報工作，後來仲返到內地加入過軍隊，直到日軍投降之後先至返到香港。

蔡彼得喺2000年成為香港退伍軍人聯會會長，熱心出席所有所有紀念活動。對於佢嘅離世， 香港退伍軍人聯會主席林秉惠表示可惜，下周仲會喺銅鑼灣會所設公眾弔唁活動。

原圖嚟自網絡