尋日就同史友們講到美國史上最大嘅一次貿易戰並且引發埋經濟大蕭條，喺大蕭條發生之前，其實仲有一件有象徵意義嘅事可以同大家介紹下，呢件事就係1929年嘅華爾街股災。

喺現代對1929年華爾街股災有住好多唔同嘅稱呼，普遍都係用「黑色星期四」、「黑色星期一」及「黑色星期二」嚟形容，但由於股災唔係喺同一日發生，所以一共四個嘅別稱都可以用。呢場股災喺1929年10月24日星期四發生，但真正暴跌就係星期一同星期二嘅事，如果計埋牽連層面同埋持續嘅時間，呢次股災就被譽為係美國史上最嚴重嘅一次股災，唔單止美國，股災亦都令到全球廣泛地區步入持久大蕭條。

講咁耐到底點解會冇啦啦爆發股災呢？要知道喺1920年代係成個美國、甚至歐洲最繁榮嘅年代，被稱為「歷史上最為多彩的年代」，人人都想過上奢華嘅生活。早喺1925年美國房地產已經走到頂峰，而嚟到股災發生之前就係股市上嘅牛市，交投異常活躍，投機風氣熾熱。喺咁樣嘅時代背景之下，唔少投機者都加入股票市場，甚至借錢去投資，結果市場上借出嘅85億美金貸款佔咗股市市值三分之二，仲多過美國市面流通貨幣。雖然聯儲局有嘗試阻止，但係股價不斷上升就令到人不斷投資，就咁樣形成經濟泡沫喺1929年10月24日開始爆發，唔少股票指數跌咗足足一個月去到歷史低位先完，唔少人嘅財富就已經化為烏有。

原圖嚟自網絡