喺三年零八個月嘅呢段日子,有過唔少悲慘嘅事蹟,除咗有阿史之前提過嘅日軍遺棄戰俘喺螺洲上自生自滅之外,里斯本丸號戰俘船事件同樣都係一件悲劇。

喺1941年日軍攻佔咗香港之後,有過萬名英國、澳洲以及加拿大籍嘅軍人都成為戰俘,分別被囚禁喺馬頭涌、赤柱、北角同埋深水埗四個集中營入面。由於要養住咁大批戰俘係有一定經濟壓力,日本就決定喺1942年嘅9月25日分批將1,816個戰俘送到日本做苦役,而第一批被運送嘅係英國籍嘅戰俘,佢哋當時就上咗一架停泊喺昂船洲,前身係日本郵船但後來改裝成武裝客貨輪嘅「里斯本丸」。

呢艘客輪喺10月1日就去到浙江舟山對開海面,但當時船身上並無任何標示係運載戰俘,結果當時美國太平洋艦隊潛艇部隊第81分隊嘅一艘「鱸魚號」(USS Grouper)就發出魚雷打中船隻。當時嘅日本軍人並無即時救援,反而係先將船上嘅日本軍人轉移到另一隻日本運輸船「豐國丸」(Toyokuni Maru),至於船上就有25名衛隊軍人同埋77名船員,佢哋將船上所有艙口釘上木條,防止戰俘逃走。而去到10月2日,本身未嚴重入水嘅「里斯本丸」就正式沉沒,唔少戰俘都跳船逃生,但當時日軍並冇提出救援,反而係射殺海上嘅戰俘。

當時「里斯本丸」沉沒嘅位置相當接近舟山群島嘅幾個海島,青浜島同埋廟子湖島島上嘅漁民見到咁嘅情況就冒住日軍槍擊嘅危險自發出動漁船46艘,一共救咗戰俘662人,但當中就有接近1,000人葬身海上。呢件事喺近年就被英國媒體重新調研同報道,唔少後人都想搵返先人嘅遺骸埋葬。

原圖嚟自網絡