昔日中環地標——第三代郵政總局

依家經過行過中環，遍佈嘅高樓大廈可能就係呢個區域嘅一大特色，但如果時間返到去上個世紀，喺呢個區域就有唔少好特別嘅英式建築，其中一座最特別嘅就係第三代郵政總局。

近年嚟就傳出第四代郵政總局可能會難逃一拆，呢個消息就令到唔少網友都搵返啲郵局舊照嚟睇，而曝光率最高嘅往往就係第三代郵政總局。呢座建於1911年嘅英國愛德華時期建築，座落喺德輔道中、畢打街一帶，係當時中環一個重要地標。郵政總局一共就樓高四層，完全呈現愛德華時期建築嘅特色，仲有英國文藝復興時期嘅風格，以花崗石同埋紅磚相隔砌成，而且亦都設有大型圓拱、帶狀磚飾、再加埋配合香港氣候嘅拱型大窗台以及寬闊走廊，係當時一座好經典嘅建築物。

呢座建築喺中環屹立超過半世紀，但就因為1970年代港府展開地鐵建造工程，總局所在嘅地段就因為要興建中環站而拆卸，同一塊地後來就賣咗畀「環球大廈」。當年就有唔少保育人士出嚟抗議，但仍然無阻大樓拆卸嘅命運，而郵政總局最後就喺1976年被拆卸，搬到位於康樂廣場海傍嘅現址。至於同大樓相關嘅文物，可能要去到嘉道理農場先睇到幾條簷廊石柱喇！