喺1971年嘅8月16日,就發生過一件當年震驚全港嘅航運事故,喺大嶼山對開海域,就因為颱風露絲吹襲,引發佛山號翻沉。

佛山號係一艘專門提供港澳載客服務嘅輪船,係六十年代最主要嘅客輪之一,但就喺1971年嘅今日,颱風吹襲而喺香港時間晚上十點五十分懸掛十號風球。當時呢艘客輪其實停泊咗喺昂船洲對開海面,並且已經放低錨嚟固定位置。但係去到凌晨時分,錨鍊就因為受到風勢吹襲而被扯斷,佛山號亦都因為咁而喺海面飄流,並且同其他船隻碰撞。

佛山號嘅船員曾經嘗試喺風中航行,但就唔成功;後來發出過求救信號,但亦都因為風勢太強烈而冇船隻嚟到救援,結果就喺扒頭鼓一帶被吹翻沉沒,船上連同船員一共有92人,最後就只有4人獲救,當中就只係搵得返73人嘅遺體。事後,就有人喺大嶼山扒頭鼓豎立佛山輪紀念碑悼念死者,早年仲有人喺長洲一帶為呢班死者進行祭祀。

原圖嚟自網絡