香港開埠初期有過唔少好出色嘅人物，阿史上次就同史友們介紹完第一位移居到香港、並且進行傳教、教育工作嘅叔何顯理女士，今次就想同大家介紹下一位商人以及重要嘅公職人員——吉席·保羅·遮打。

遮打爵士出生喺印度加爾各答，係一位亞美尼亞裔香港商人，喺平凡家庭長大嘅佢，幼年就喺利生銀行工作，主要就係幫客戶寫存摺，亦都係呢段經歷令到佢認識到沙宣家族，進而打入上流社會嘅圈子。

唔講可能大家都唔知，遮打同早前介紹過嘅麼地先生其實係朋友，亦都同樣喺利生銀行打過工，所以就喺1868年開始合辦公司，以地產同埋股票市場為主，亦都憑住自己嘅眼光，喺尖沙咀一帶嘅土地投資獲得相當可觀嘅利潤。遮打爵士喺商業上仲有唔少成就，例如1886年組成香港九龍碼頭貨倉有限公司、參與成立牛奶公司、甚至1889年仲同怡和洋行大班合資成立香港置地，幾年間真係風生水起。

除咗商業上嘅成就，遮打仲有唔少公職，早喺1876年就被委任做高級太平紳士，後來喺1887年到1905年仲做過立法局非官守議員，對維港填海政策作出過唔少建議。後來佢仲入埋行政局，成為第一批非官守議員；佢更加係香港第一家股票交易所香港股票經紀會主要發起人，喺各方面都對香港嘅發展有住深遠嘅影響，所以後來港府直頭用到名「遮打道」（Chater Road）同埋「吉席街」（Catchick Street）紀念佢。

原圖嚟自網絡