早幾日就係二次世界大戰日本投降75周年嘅日子,提起呢段時期唔多唔少都令人諗返起三年零八個月日佔侵占香港嘅歷史。喺日軍侵占香港嘅時候,除咗有由各國軍人組成嘅軍隊之外,香港當時仲有一枝由本地民兵、居港嘅外籍人士組成嘅軍隊,叫做曉士兵團。

曉士兵團喺1940年成立,專門係為咗抵抗日軍而組成,主要嘅成員既有退咗役嘅英軍,亦都有其他國家嘅僑民,年紀都超過55歲,另外一部分香港電燈公司以及太古船塢嘅工作人員。

講起呢支曉士兵團,團入面有唔少退役軍人都曾經參加過一戰,有過前線作戰嘅經驗,負責領導呢枝軍隊嘅並唔係正統嘅軍人,反而係怡和洋行大班、行政、立法居議員百德新。喺1941年12月8日,日軍發動侵略戰爭,當時曉士兵團就被指定要守住港島一個重要嘅據點——北角發電廠。

本來都相安無事,但直到12月13日日軍攻陷九龍之後,就開始炮轟發電廠,當時負責防守呢度嘅曉士兵團一共就有接近70人,都係由電燈公司、太古船塢、中華電力公司嘅職員組成。戰事去到12月18日就真係展開,日軍就登陸港島,好快對北角發電廠展開攻擊,但由於受到曉士兵團激烈反抗,令到日軍只好繞道去港島其他地方。眼見呢個場面,曉士兵團就主動進行,喺19日出擊,去到炮台山道一帶摧毀咗日軍嘅炮兵陣地,仲喺英皇道同電氣道展開激戰,雙方各有死傷。直到同日嘅下午,曉士兵團喺彈盡糧絕之下,就只好投降,大部分人都被日軍俘虜,囚禁喺赤柱拘留營。

原圖嚟自網絡