喺二次世界大戰嘅後期，雖然話日軍同埋盟軍之間嘅軍力已經有好大嘅差距，但其實盟軍嘅海軍並唔係咁容易可以靠近到日本本土，事關當時日本有一支對海軍艦艇編隊有住極大破壞力嘅部隊，呢隊部隊名為「神風敢死隊」。

「神風敢死隊」仲有好多個別稱，例如「神風突擊隊」、「神風特攻隊」等等，當中「神風」呢個詞大有來頭。相傳喺元朝嘅時候，元世祖喺1274年同埋1281年分別對日本發動兩次東征，但都因為喺海上遇到颱風而令到元朝艦隊損傷慘重，日本人當時就叫呢兩陣風做「神風」，並且認為「神風」就係由應神天皇掀起。於是喺二戰嘅時候，「神風敢死隊」嘅發起人大西瀧治郎就取用呢個名命名部隊。

提起呢支部隊，可能已經有史友知道佢哋係利用咗日本人嘅武士道精神而創立，主張以「一人、一機、一彈換一艦」，而呢種自殺式嘅攻擊喺結論上嚟講真係可以用最少資源達到最高破壞力。據講呢支部隊最早出現嘅戰場係喺日俄戰爭，最有組織嘅時候就係二戰嘅雷伊泰灣海戰，當時日軍被命令用40架戰機守住美軍登陸菲律賓。由於實力懸殊，司令長官大西瀧治郎中將就提出將軍機裝填炸藥撞擊美軍航母，咁樣就可以令對方癱瘓幾個星期。結果當時佢就搵嚟軍事學校17歲左右嘅畢業生參加，當中仲有一位上尉關行男只係新婚4個月，結果呢次戰術相當成功，而呢隊「神風敢死隊」就已經無緣同屋企人見面喇。

「神風敢死隊」下設大和、敷島、朝日、山櫻四個小隊，喺二戰後期一共有4,000個隊員喪生，接迎四份一人都可以擊中目標，令到盟軍有7,000人傷亡，並且至少47艘盟軍艦船被擊沉，300幾艘被擊傷。然而去到戰爭後期，國內工業已經生產唔到飛機，而有經驗嘅飛行員都死得七七八八。

原圖嚟自網絡